नवी मुंबईत सेक्टर 36, सी वूड्स नेरूळ येथील सी होम्स को. ऑप. हौ. सोसा. या 21 मजली इमारतीमध्ये शनिवार दि. 8 फेब्रुवारी 2020 रोजी सकाळी 6 ते 6.30 च्या सुमारास विसाव्या मजल्यावरील एका सदनिकेच्या किचनमध्ये आग लागली होती व त्यानंतर ती 21 व्या मजल्यापर्यंत पसरली. या घटनेची माहिती मिळताच नवी मुंबई महानगरपालिकेचे अग्निशमन दल तातडीने 6 वा. 31 मि. ला घटनास्थळी दाखल झाले आणि तातडीने बचावकार्यास प्रारंभ करण्यात आला.

     घटनेचे गांभीर्य लक्षात घेऊन अग्निशमन पथकाने प्रथमत: संपूर्ण  इमारतीमधील रहिवाशांना सुरक्षितरित्या बाहेर काढले. आग आटोक्यात आणण्यासाठी महानगरपालिकेच्या अग्निशमन विभागाच्या जवानांनी शर्थीचे प्रयत्न करीत 8 बंब आणि ब्रान्टो स्काय लिफ्ट या अत्याधुनिक वाहनाच्या सहाय्याने आग आटोक्यात आणली. ही आग आटोक्यात आणण्यासाठी साधारणत: पाच तासाचा कालावधी लागला. आगीमध्ये कोणत्याही प्रकारची जिवीतहानी झाली नसून ही आग आटोक्यात आणत असताना अग्निशमन दलाचे 7 जवान मात्र जखमी झाले आहेत. सदर जवानांनी तात्काळ नमुंमपा रूग्णालयात दाखल करण्यात आले असून त्यांची प्रकृती स्थिर आहे. सदर निवासी इमारतीचा 20 व 21 वा मजला पूर्णपणे जळालेला आहे. या घटनेची तपासणी केली असता, सदर सोसायटीने सन 2018 पासून फायर ऑडिट केले नसल्याचे निदर्शनास आले आहे.