कोव्हीड 19 प्रतिबंधात्मक उपाययोजनांच्या अनुषंगाने ज्या ठिकाणी कोरोना पॉझिटिव्ह रुग्ण मोठ्या संख्येने आढळले आहेत अशा भागांमध्ये महापालिका आयुक्त श्री. अण्णासाहेब मिसाळ यांच्या मार्गदर्शनाखाली मोठ्या प्रमाणावर कोव्हीड 19 तपासणी मोहिम हाती घेण्यात आली असून आज कोपरखैरणे, दिघा, तुर्भे व ऐरोली अशा 4 विभागात मास स्क्रिनींगची मोहिम प्रभावी रितीने राबविण्यात आली. या 5 ठिकाणी आयोजित करण्यात आलेल्या तपासणीमध्ये एकूण 6324 नागरिकांची तपासणी करण्यात आली.

      यामध्ये सेक्टर 14 कोपरखैरणे विभागात महापालिका नागरी आऱोग्य केंद्रासह डॉ. डि.वाय. पाटील रुग्णालयाच्या वैद्यकीय समुहाने 279 नागरिकांची तपासणी केली तसेच कोपरखैरणे विभागातील महापेगांव परिसरात 873 नागरिकांची तपासणी केली. कोरोना सदृष्य लक्षणे आढळणा-या 10 नागरिकांचे स्वॅब कलेक्शन करण्यात आले.

      अशाच प्रकारे तुर्भे विभागातील सेक्टर 5 सानपाडा येथील मास स्क्रिनींग कॅम्पमध्ये महापालिका नागरी आरोग्य केंद्रासह तेरणा हॉस्पिटलच्या वैद्यकीय समुहाने 417 नागरिकांचे मास स्क्रिनींग केले व कोरोना सदृष्य लक्षणे आढळलेल्या 2 नागरिकांचे स्वॅब कलेक्शन करण्यात आले.

      ईश्वरनगर दिघा भागात महापालिका नागरी आरोग्य केंद्र यांच्यासह अमृत प्रेरणा सेवाभावी संस्था यांच्या वैद्यकीय समुहाने 4512 नागरिकांचे मास स्क्रिनींग केले. त्यामध्ये कोरोना सदृष्य लक्षणे आढळणा-या 10 नागरिकांचे स्वॅब कलेक्शन करण्यात आले.

      त्याचप्रमाणे सेक्टर 4 ऐरोली येथील मास स्क्रिनींग कॅम्पमध्ये महापालिका नागरी आरोग्य केंद्रासह डॉ. डि.वाय. पाटील हॉस्पिटलच्या वैद्यकीय समुहाने 243 नागरिकांचे मास स्क्रिनींग केले व कोरोना सदृष्य लक्षणे आढळलेल्या 9 नागरिकांचे स्वॅब कलेक्शन करण्यात आले.

      या कोव्हीड 19 तपासणी मोहिमेव्दारे कोरोनाच्या अनुषंगाने नागरिकांची विशेष तपासणी केली जात  असून याव्दारे कोरोनाची साखळी खंडीत करण्यासाठी उपयोग होत आहे. सोमवारी 8 जून रोजी चिंचपाडा ऐरोली येथे, खैरणेगांव येथे, सेक्टर 2 ऐरोली येथे तसेच हनुमान नगर तुर्भे येथे कोव्हीड 19 विशेष मास स्क्रिनींग मोहीम राबविली जाणार आहे.

      नागरिकांनीही मास्कचा नियमित वापर करून व सोशल डिस्टन्सींगचे पालन करून कोरोनाच्या विषाणूला आपल्यापासून दूर ठेवावे असे आवाहन महापालिका आयुक्त श्री.अण्णासाहेब मिसाळ यांच्या वतीने करण्यात येत आहे.