सुनियोजित शहर अशी ओळख असणा-या नवी मुंबई महानगरपालिका क्षेत्रातील अनधिकृत बांधकाम विरोधी मोहिम महानगरपालिकेने तीव्र केलेली असून विविध विभागांमध्ये अतिक्रमणे व अनधिकृत बांधकामे यांना नोटीसा देऊन तसेच  नोटीस कालावधी संपल्यानंतर त्यावर निष्कासनाची कारवाई करण्यात येत आहे.

      अशाचप्रकारे नवी मुंबई महानगरपालिका कार्यक्षेत्रातील तुर्भे विभागांतर्गत घर क्र. 1407, तुर्भेगांव व घर क्र. 1418, तुर्भेगांव यांनी महानगरपालिकेची कोणतीही पुर्व परवानगी न घेता अनधिकृतपणे बांधकाम सुरु केले होते. या अनधिकृत बांधकामास महाराष्ट्र प्रादेशिक व नगररचना अधिनियम, 1966 चे कलम 54 अन्वये नोटीसा बजावण्यात आलेल्या होत्या. परंतु, सदर ठिकाणी अनधिकृत बांधकाम सुरु ठेवले होते.

या अनधिकृत बांधकामावर तुर्भे विभाग कार्यालयामार्फत तोडक कारवाईच्या मोहिमेचे आयोजन करण्यात आलेले होते. सदर ‍मोहिमे अंतर्गत ‍दोन्ही अनधिकृत बांधकामे निष्कासित करण्यात आलेली असुन मोहिमेसाठी तुर्भे विभागातील अधिकारी / कर्मचारी उपस्थित होते. ‍तसेच अतिक्रमण निर्मुलन पथकातील पोलीस अधिकारी / कर्मचारी तैनात होते. या मोहिमेकरीता 10 मजुर, 01 इलेक्ट्रीक हॅमर, 10 हातोडे यांचा वापर करण्याaत आलेला आहे.

त्याचप्रमाणे वाशी विभागांतर्गत घर नं ७७६, गोकुळ निवास, जुहूगाव, वाशी येथील पहिल्या मजल्याचे बांधकाम नवी मुंबई महानगरपालिकेची कोणतीही पुर्व परवानगी न घेता अनाधिकृतपणे बांधकाम सुरू केले होते. या अनाधिकृत बांधकामास वाशी विभागामार्फत महाराष्ट्र प्रादेशिक नियोजन व नगररचना अधिनियम 1966 मधील कलम 54 अन्वये नोटीस बजावण्यात आलेली होती. परंतु त्यांनी सदर ठिकाणी अनाधिकृत बांधकाम सुरू ठेवले होते.

      या अनाधिकृत बांधकामावर वाशी विभाग कार्यालयामार्फत तोडक मोहिमेचे आयोजन करून अनाधिकृत बांधकाम निष्कासित करण्यात आले. या धडक मोहिमेसाठी वाशी विभागाकडील अधिकारी / कर्मचारी, 10 मजूर, 2 गॅस कटर, 2 हॅमर, 4 घन /हातोडे  तसेच अतिक्रमण विभागाकडील पोलीस पथक तैनात होते.

      यापुढे देखील अशा प्रकारे कारवाई तीव्र करण्यात येणार आहे.