राज्यस्तरीय बालनाट्य स्पर्धेच्या यशस्वी आयोजनानंतर नवी मुंबई महानगरपालिकेच्या वतीने नमुंमपा करंडक राज्यस्तरीय एकांकिका स्पर्धेचे आयोजन करण्यात आले असून 16 व 17 मार्च रोजी विष्णुदास भावे नाट्यगृहात स्पर्धेची महाअंतिम फेरी संपन्न होत आहे. महाअंतिम फेरीच्या शुभारंभप्रसंगी ज्येष्ठ नाट्य व चित्रपट दिग्दर्शक श्री. कुमार सोहोनी यांच्या शुभहस्ते नटराज प्रतिमापूजन करून शुभारंभ संपन्न झाला.

          याप्रसंगी प्रशासन विभागाचे उपआयुक्त श्री. नितिन नार्वेकर, क्रीडा व सांस्कृतिक कार्य विभागाचे उपआयुक्त श्री. सोमनाथ पोटरे, महापालिका सचिव श्रीम. चित्रा बाविस्कर, क्रीडा अधिकारी श्री. रेवप्पा गुरव तसेच परीक्षक म्हणून ज्येष्ठ नाट्य दिग्दर्शक श्री. कुमार सोहोनी, श्री. विजय केंकरे व अभिनेत्री श्रीम. ईला भाटे उपस्थित होते.

        विविध स्पर्धांच्या आयोजनातून नवी मुंबई महानगरपालिका खेळाडू व कलावंतांना प्रोत्साहन देत असून महापालिका आयुक्त श्री. राजेश नार्वेकर यांच्या मार्गदर्शनाखाली त्यांच्या गुणांच्या प्रदर्शनासाठी हक्काची व्यासपीठे उपलब्ध करून देत आहे. यापैकीच एक उपक्रम राज्यस्तरीय एकांकिका स्पर्धेचा असून या स्पर्धेलाही संपूर्ण राज्यभरातून उत्साही प्रतिसाद लाभला आहे. यामध्ये 40 नाट्य संस्थांनी सहभागी होत हा स्पर्धा उपक्रम यशस्वी केला.

           दि. 10 व 11 मार्च रोजी या राज्यस्तरीय एकांकिका स्पर्धेची प्राथमिक फेरी नवी मुंबई, पुणे व नाशिक अशा 3 केंद्रांवर उत्साहात संपन्न झाली. यामध्ये नवी मुंबई केंद्रावर नवी मुंबई, मुंबई, ठाणे, रायगड परिसरातील 20 नाट्यसंस्थांनी प्राथमिक फेरीत सहभागी होत एकांकिका सादरीकरण केले. सुप्रसिध्द अभिनेते श्री. शेखर फडके व श्री. रवी वाडकर यांनी या एकांकिका स्पर्धेच्या प्राथमिक फेरीचे परीक्षण केले.       त्याचप्रमाणे पुणे केंद्रावरील प्राथमिक फेरीत सादर झालेल्या 10 एकांकिकांचे आणि नाशिक केंद्रावरील 10 एकांकिकांचे परीक्षण नामवंत रंगकर्मी श्री. वैभव सातपुते यांनी केले.

         अशा प्रकारे एकूण 40 एकांकिकांमधून 15 सर्वोत्तम एकांकिकांची निवड अंतिम फेरीसाठी करण्यात आली असून या एकांकिका स्पर्धेच्या महाअंतिम फेरीला  सिध्दरुढ ठाणे या नाट्यसंस्थेने सादर केलेल्या ‘डिट्टो रखुमाई’ एकांकिकेने प्रारंभ झाला. उद्या 17 मार्च रोजी अंतिम फेरीतील 15 एकांकिकांचे सादरीकरण झाल्यानंतर सायं. 6 वाजता वाशी येथील विष्णुदास भावे नाट्यगृहामध्ये या स्पर्धेचा पारितोषिक वितरण समारंभ संपन्न होणार आहे.

           या स्पर्धेच्या अंतिम फेरीचे परीक्षण सुप्रसिध्द दिग्दर्शक श्री. कुमार सोहोनी व श्री. विजय केंकरे तसेच सुप्रसिध्द अभिनेत्री श्रीम. इला भाटे करीत असून नवी मुंबई महानगरपालिका करंडक राज्यस्तरीय एकांकिका स्पर्धेत महाअंतिम फेरीसाठी निवडण्यात आलेल्या सर्वोत्तम 15 एकांकिका पाहण्यासाठी कोणतेही प्रवेशशुल्क नसून नाट्य रसिकांनी आवर्जून उपस्थित राहून नाट्यकलावंतांना दाद द्यावी असे आवाहन क्रीडा व सांस्कृतिक कार्य विभागाचे उपआयुक्त श्री. सोमनाथ पोटरे यांच्या वतीने करण्यात येत आहे.