'इंडियन स्वच्छता लीग' मध्ये मागील वर्षी सर्वाधिक युवक सहभागाबद्दल देशात प्रथम क्रमांकाचा बहुमान मिळविणारे शहर म्हणून नामांकित नवी मुंबई शहर यावर्षीही इंडियन स्वच्छता लीग 2.0 मध्ये सहभागासाठी नमुंमपा आयुक्त तथा प्रशासक श्री. राजेश नार्वेकर यांच्या मार्गदर्शनाखाली सज्ज झालेले आहे.

                याकरिता नवी मुंबई महानगरपालिकेचा नवी मुंबई इको नाईट्स हा संघ कर्णधार पद्मश्री शंकर महादेवन यांच्या नेतृत्वाखाली सज्ज झालेला असून नागरिक https:/innovateindia.mygov.in/islseason2/ या लिंकवर क्लिक करून नवी मुंबईच्या संघातील सहभाग नोंदवित आहेत.

              लीग अंतर्गत विविध उपक्रमांचे आयोजन केले जात असून त्यामध्येही नागरिक मोठ्या प्रमाणावर सहभागी होत आहे. नमुंमपा आणि खाजगी शाळांमध्ये शुक्रवारी घेण्यात आलेल्या चित्रकला स्पर्धेत 431 शाळांमधील 1 लाख 83 हजार 144 विदयार्थ्यांनी सहभागी होत विक्रम नोंदविलेला आहे. या विक्रमाची नोंद ‘बेस्ट ऑफ इंडिया रेकॉर्ड्स’ मध्ये घेण्यात आलेली आहे.

               स्वच्छ शहर ही नवी मुंबईची ओळख येथील स्वच्छताप्रेमी नागरिकांच्या उत्साही सहभागामुळे संपूर्ण देशात दृढ झालेली आहे. त्या अनुषंगाने ‘इंडियन स्वच्छता लीग 2.0’ अंतर्गत संपूर्ण नवी मुंबई शहरात स्वच्छतेची चळवळ उभी रहावी यादृष्टीने रविवार, दि. 17 सप्टेंबर 2023 रोजी, बेलापूर ते दिघा अशा आठही विभाग कार्यालय क्षेत्रात नागरिक एकत्र जमून स्वच्छतेची सामुहिक शपथ ग्रहण करणार आहेत. या माध्यमातून स्वच्छतेविषयी नवी मुंबईकर नागरिक किती जागरूक आणि उत्साही आहेत याचे प्रत्यंतर येणार आहेच त्यासोबतच नवी मुंबई शहरातील एकात्म भावनेचेही दर्शन घडणार आहे.

                हा सामुहिक स्वच्छता शपथ ग्रहण उपक्रम आठ वॉर्डात एकाच वेळी सकाळी ठीक 8.00 वा. संपन्न होणार असून याठिकाणी सामुहिकरित्या शपथ ग्रहण एवढाच कार्यक्रम असणार आहे. या उपक्रमाच्या पूर्वतयारीविषयी आयुक्त श्री. राजेश नार्वेकर यांच्यामार्फत सातत्याने बैठका घेण्यात आल्या असून विभागप्रमुखांसह विभाग अधिकारी, कार्यकारी अभियंता व अधिकारी, कर्मचारी यांच्याकडे विविध जबाबदा-या वाटून देण्यात आलेल्या आहेत. 

उपक्रमाची विभागनिहाय 8 ठिकाणे -

• बेलापूर : राजीव गांधी क्रीडा संकुल, सेक्टर 3 ए, सीबीडी बेलापूर.
• नेरूळ: ज्वेल ऑफ नवी मुंबई, सेक्टर 26, नेरूळ.
• वाशी : मॉडर्न महाविद्यालय मैदान, सेक्टर 15 /16, वाशी.
• तुर्भे : जयपुरिया स्कूल जवळ, सेक्टर 18, सानपाडा.
• कोपरखैरणे : निसर्ग उद्यान, सेक्टर 14, कोपरखैरणे.
• घणसोली : सेंट्रल पार्क, सेक्टर 3, घणसोली.
• ऐरोली : आर आर पाटील मैदान, भारतरत्न डॉ बाबासाहेब आंबेडकर स्मारकाजवळ, सेक्टर 15, ऐरोली.
• दिघा : नागरी आरोग्य केंद्रासमोरील पटांगण, दिघा.

                 याप्रमाणे जाहीर करण्यात आली असून नागरिकांनी आपल्या निवासस्थानापासून जवळच्या ठिकाणी स्वच्छ शहराविषयीची आपला अभिमान व्यक्त करण्यासाठी आणि देशात पहिल्या क्रमांकाच्या मानांकनाचे ध्येय साकारण्यासाठी आवर्जून उपस्थित रहावे असे आवाहन करण्यात आले आहे.

                तरी नवी मुंबई महानगरपालिका क्षेत्रातील शाळा व महाविद्यालयीन विदयार्थी, युवक, महिला बचतगट व महिला मंडळे, विविध प्रकारच्या स्वयंसेवी संस्था, मंडळे, लोकप्रतिनिधी, प्रसारमाध्यमे, आबालवृध्द नागरिक अशा सर्वच नवी मुंबईकर नागरिकांनी स्वच्छता ही नवी मुंबई शहराची ओळख अधोरेखित करण्यासाठी तसेच नवी मुंबईच्या एकात्म भावनेचे व्यापक दर्शन घडविण्यासाठी रविवार दि.17 सप्टेंबर 2023 रोजी, सकाळी 7.30 वा. आठ ठिकाणांपैकी आपणास सोयिस्कर असलेल्या ठिकाणी उपस्थित रहावे आणि सकाळी ठीक 8.00 वा. संपन्न होणा-या सामुहिक शपथ उपक्रमात आपला सहभाग नोंदवावा तसेच https:/innovateindia.mygov.in/islseason2/ या वेबलिंकवर आपली नोंदणी करून इंडियन स्वच्छता लीग मध्ये आपला सहभाग नोंदवावा असे नमुंमपा आयुक्त श्री. राजेश नार्वेकर यांच्या वतीने आवाहन करण्यात येत आहे.