मराठी नाटकांवर भरभरून प्रेम करणारी रसिक माणसे ही ऊर्जा असून 32 वर्षात 12500 प्रयोग करू शकलो ते उत्तम दिग्दर्शक, सहकलाकार लाभले म्हणूनच असे सांगत सुप्रसिध्द अभिनेते श्री. प्रशांत दामले यांनी रसिकांचा कायम आशिर्वाद लाभला हेच या विक्रमी प्रयोगांमागील खरे गमक असल्याचे नवी मुंबई येथील विष्णुदास भावे नाट्यगृहातील विशेष सत्काराप्रसंगी सांगितले.

 महाराष्ट्रात 52 ठिकाणी नाट्यप्रयोग होऊ शकतात, त्यामध्ये नवी मुंबई महानगरपालिकेचे विष्णुदास भावे नाट्यगृह स्वच्छता आणि सुविधांच्या दृष्टीने टॉप फाईव्हमध्ये असून त्यासाठी महापालिका आयुक्त आणि त्यांच्या  सहका-यांच्या नियमित जागरूकतेबद्दल श्री. प्रशांत दामले यांनी गौरवोद्गार काढले. नवी मुंबईतील भावे नाट्यगृह उत्तम आहेच त्या सोबतच नाटक कसे बघायचे हे उत्तमरित्या कळणारे नाट्यरसिक इथे आहेत असा विशेष उल्लेख त्यांनी केला.

आपल्या 39 वर्षांच्या रंगभूमीवरील अभिनय कारकिर्दीत 12500 प्रयोगांचा टप्पा पार करण्याचा अनोखा विक्रम करणारे सुप्रसिध्द अभिनेते श्री.प्रशांत दामले यांचा विष्णुदास भावे नाट्यगृह येथे नवी मुंबई महानगरपालिकेच्या वतीने प्रशासन विभागाचे उप आयुक्त श्री. नितीन नार्वेकर आणि क्रीडा व सांस्कृतिक कार्यक्रम विभागाचे उप आयुक्त श्री. सोमनाथ पोटरे यांच्या शुभहस्ते शाल, पुणेरी पगडी व सन्मानचिन्ह प्रदान करून विशेष सन्मान कऱण्यात आला. ‘एका लग्नाची पुढची गोष्ट’ हा हाऊसफुल्ल नाट्यप्रयोगाप्रसंगी संपन्न झालेल्या या गौरवाप्रसंगी नाटकातील सहकलावंत श्रीम. कविता मेढेकर, श्री.अतुल तोडणकर, श्रीम.पूर्वा भिडे, श्री. अतुल तोडणकर, श्रीम. राजसी चिटणीस, श्री.राजसिंह देशमुख, श्री.पराग डांगे यांनाही सन्मानीत करण्यात आले.   

1983 साली ‘टुरटूर’ या नाटकापासून आपल्या व्यावसायिक अभिनय कारकिर्दीला सुरुवात केलेल्या श्री. प्रशांत दामले यांनी आपल्या 39 वर्षांच्या नाट्यकारकिर्दीत 12500 हून अधिक नाट्यप्रयोग केले. या विक्रमानिमित्त महाराष्ट्र राज्याचे मुख्यमंत्री महोदय व उपमुख्यमंत्री महोद्य यांच्या हस्ते त्यांच्या कारकिर्दीचा मुंबईतील षण्मुखानंद सभागृह येथे 12500 व्या प्रयोगाप्रसंगी रंगभूमीदिनाचे औचित्य साधून विशेष गौरव करण्यात आला. सुप्रसिध्द अभिनेते श्री. अमिताभ बच्चन यांनीही आपल्या ब्लॉगवरून मराठी रसिकांना नाटकांवर प्रेम करायला लावण्यात प्रशांतजींचे मोठे योगदान असल्याचे लिहीत प्रशांतजींच्या कामाचा मी चाहता असल्याचे मत व्यक्त केले.

रंगभूमीवरील या विक्रमी वाटचालीबद्दल नवी मुंबई महानगरपालिकेनेही 12503 व्या प्रयोगाप्रसंगी विष्णुदास भावे नाट्यगृहात विशेष सन्मान करीत श्री. प्रशांत दामले यांचे समस्त नवी मुंबईकर नागरिकांच्या वतीने अभिनंदन करीत त्यांच्या आगामी कारकिर्दीला शुभेच्छा दिल्या.