शासन निर्देशानुसार 18 वर्षावरील नागरिकांच्या कोव्हीड लसीकरणाला सुरूवात करण्यात आलेली असून आज पहिल्याच दिवशी महानगरपालिकेच्या 27 लसीकरण केंद्रांवर उत्साहाने उपस्थित रहात 18 वर्षावरील 3449 नागरिकांनी  लसीकरणाला उत्तम प्रतिसाद देत कोव्हीड लसीचा पहिला डोस घेतला.

      नवी मुंबई महानगरपालिकेच्या वतीने कोव्हीड लसीकरणाला गती मिळावी याकरिता लसीकरण केंद्रांमध्ये वाढ करण्यात आलेली असून सध्या 59 लसीकरण केंद्रे कार्यान्वित आहेत. त्यामधील वाशी, नेरूळ, ऐरोली येथील सार्वजनिक रूग्णालये, तुर्भे माता बाल रूग्णालय, सेक्टर 5 वाशी येथील आएसआयएस हॉस्पिटलमधील जम्बो लसीकरण सेंटर तसेच 23 प्राथमिक नागरी आरोग्य केंद्रे अशा 27 ठिकाणी 18 वर्षावरील नागरिकांच्या लसीकरणाची व्यवस्था करण्यात आली होती.

      नवी मुंबई महानगरपालिकेच्या वतीने लसीकरणाच्या प्रक्रियेला वेग देत ज्या प्रमाणात लस उपलब्ध होत आहेत त्यानुसार नागरिकांना घरापासून जवळ सोयीचे ठरेल अशाप्रकारे केंद्र संख्येत वाढ करीत आहे. आहे. दररोज संध्याकाळी दुस-या दिवशी कोणत्या लसीकरण केंद्रांवर लसीकरण होणार आहे याची माहिती तेथे उपलब्ध असणा-या डोसच्या संख्येसह विविध माध्यमांतून प्रसिध्द करण्यात येत आहे.

      आत्तापर्यंत 5 लाखाहून अधिक नागरिकांनी कोव्हीड लसीचा पहिला डोस घेतला असून आता 18 वर्षावरील नागरिकांनाही लसीचा लाभ घेता येणार आहे. तरी नागरिकांनी दररोज जाहीर करण्यात येणा-या लसीकरण केंद्रांच्या यादीवरील आपल्या जवळच्या केंद्रांवर थेट जाऊन कोव्हीडपासून संरक्षण देणा-या लसीकरणाचा लाभ घ्यावा असे आवाहन महापालिका आयुक्त श्री. अभिजीत बांगर यांच्या वतीने करण्यात येत आहे