कोरोनाचा प्रसार रोखण्यासाठी करण्यात येत असलेल्या उपाययोजनांचा एक भाग म्हणून मोठ्या संख्येने कोरोना रुग्ण सापडलेल्या कोपरखैरणे व तुर्भे विभागाकडे महापालिका आयुक्त श्री. अण्णासाहेब मिसाळ यांच्या मार्गदर्शनाखाली विशेष लक्ष देण्यात येत आहे. या अनुषंगाने 26 मे पासून या दोन्ही विभागातील कंन्टेनमेंट झोनमध्ये मास स्क्रिनींग कॅम्प आयोजित करून मोठ्या प्रमाणावर नागरिकांची कोव्हीड 19 विषयक तपासणी करण्यात येत आहे.

      आज 2 जून रोजी बोनकोडेगांव क्षेत्रातील कन्टेनमेंट झोनमध्ये घेण्यात आलेल्या कोव्हीड 19 मास स्क्रिनींग कॅम्पमध्ये 925 नागरिकांची तपासणी करण्यात आली तसेच कोरोना सदृष्य लक्षणे आढळणा-या 6 नागरिकांचे त्वरीत स्वॅब कलेक्शन करण्यात आले.

      अशाचप्रकारे सेक्टर 22 तुर्भे भागातील कन्टेनमेंट झोनमध्ये आयोजित कॅम्पमध्ये 110 नागरिकांचे मास स्क्रिनींग करण्यात आले. कोरोना सदृष्य लक्षणे आढळणा-या 4 नागरिकांचे त्वरीत स्वॅब कलेक्शन करण्यात आले.  

      नवी मुंबई महानगरपालिकेचे खैरणे व तुर्भे नागरी आरोग्य केंद्र यांच्या माध्यमातून डॉ.डि.वाय.पाटील रुग्णालय आणि तेरणा रुग्णालय यांच्या डॉक्टरांचा समुह आणि महानगरपालिकेचे स्वयंसेवक पथक या मास स्क्रिनींग कॅम्पमध्ये सक्रिय आहे. याठिकाणी नागरिकांचे थर्मल स्कॅनींग करण्यात येऊन त्यांच्याशी डॉक्टर संवाद साधत प्रकृतीविषयी माहिती घेत आहेत. वैद्यकीय तपासणी करून त्यांना योग्य औषधोपचार देण्यात येत आहेत. एखाद्या नागरिकामध्ये तापाची लक्षणे आढळून आल्यास पल्स ऑक्सिमिटरने त्याच्या शरीराची ऑक्सिजन पातळी तपासण्यात येत असून एखाद्या नागरिकामध्ये कोरोना सदृष्य लक्षणे आढळल्यास स्वॅब टेस्टींग करण्यात येत आहे.

      उद्या 3 जून रोजी कोपरखैरणे विभागात सेक्टर 5 आणि सेक्टर 14 अशा दोन भागातील कन्टेनमेंट झोनमध्ये कोव्हीड 19 मास स्क्रिनींग कॅम्प राबविण्यात येत आहे. तसेच सेक्टर 21 तुर्भे आणि ईश्वरनगर दिघा येथील कन्टेनमेंट झोनमध्येही कोव्हीड 19 मास स्क्रिनींग कॅम्प राबविण्यात येत आहे.

      कोरोनाचा वाढता प्रसार रोखण्यासाठी जास्त संख्येने कोरोनाबाधीत सापडलेल्या भागाकडे विशेष लक्ष केंद्रीत करण्यात आले असून उद्याही एकाच वेळी 4 ठिकाणी मास स्क्रिनींग कॅम्प राबविण्यात येत आहे. तरी नागरिकांनी कोरोनाची साखळी खंडीत करण्यासाठी मास्कचा वापर करावा तसेच सोशल डिस्टन्सींग राखून सहकार्य करावे असे आवाहन महापालिका आयुक्त श्री. अण्णासाहेब मिसाळ यांच्या वतीने करण्यात येत आहे.