*भारतरत्न डॉ. बाबासाहेब आंबेडकर महापरिनिर्वाणदिनी ऐरोली सेक्टर 15 येथे नवी मुंबई महानगरपालिकेच्या वतीने उभारण्यात येत असलेले भारतरत्न डॉ. बाबासाहेब आंबेडकर स्मारक नागरिकांसाठी खुले व्हावे हे उद्दिष्ट नजरेसमोर ठेवून 30 नोव्हेंबरपर्यंत स्मारकाचे काम पूर्ण करण्याकडे महापालिका आयुक्त श्री. अभिजीत बांगर यांचे काटेकोर लक्ष असून या कामाचा नियमित आढावा घेतला जात आहे.*

        *यापूर्वी 7 व 29 ऑक्टोबर रोजी आयुक्तांनी स्मारकाला प्रत्यक्ष भेट देत महत्वाच्या सूचना केल्या होत्या तसेच 30 नोव्हेंबर पर्यंत स्मारकाचे काम पूर्ण होईल याची खात्री करून दिवसरात्र काम करण्याचे निर्देश दिले होते. त्या अनुषंगाने आज स्मारकाच्या कामाची सद्यस्थिती पाहण्यासाठी आयुक्तांनी त्याठिकाणी भेट देत 30 नोव्हेंबर ही आपली डेडलाईन असल्याची पुन्हा जाणीव करून देत कामाच्या गतीमानतेवर भर देण्याचे सूचित केले. तथापि गतीने काम करताना गुणवत्तेत कोणत्याही प्रकारची तडजोड खपवून घेतली जाणार नाही हे देखील स्पष्ट केले.*

       याप्रसंगी शहर अभियंता श्री. संजय देसाई, उपआयुक्त श्रीम. संध्या अंबादे, अतिरिक्त शहर अभियंता श्री. शिरीष आरदवाड, कार्यकारी अभियंता श्री. गिरीश गुमास्ते व संबंधित अधिकारी, वास्तुविशारद आणि स्मारकाची विविध कामे करणारे कंत्राटदार उपस्थित होते.

      मुख्य इमारतीच्या प्रवेशव्दारावर असलेले स्मारकाचे नाव अधिक लक्षवेधी स्वरूपात व समोरील रस्त्यावरूनही सहज दिसेल अशा प्रकारे प्रदर्शित करण्याचे आयुक्तांनी निर्देश दिले. त्यासोबतच स्मारकाच्या पाठीमागील मुलुंड-ऐरोली रस्त्यावरून जाणा-यांनाही स्मारकाची वास्तू समजावी यादृष्टीने त्याबाजूनेही आकर्षक स्वरूपात स्मारकाचे नामफलक प्रदर्शित करण्याच्या सूचना आयुक्तांनी केल्या.

      स्मारकातील कार्यक्रमांसाठी असलेल्या सभागृहाच्या कामाला गती देण्याचे निर्देश देत आयुक्तांनी तेथील वातानुकुलीत व्यवस्था, आसनव्यवस्था व ध्वनीक्षेपक व्यवस्थेची कामे दर्जेदार असावीत याकडे कटाक्षाने लक्ष देण्याचे सूचित केले. स्मारकामधील प्रार्थना स्थळाच्या कामाची पाहणी करीत तेही काम विहित वेळेत पूर्ण करण्यासाठी वेग देण्याचे निर्देशित करण्यात आले.

       स्मारकातील ग्रंथालयामध्ये डॉ. बाबासाहेब आंबेडकर यांनी विविध भाषांमध्ये लिहिलेली व त्यांच्या प्रेरणादायी जीवनावर विविध लेखकांनी लिहिलेली सर्वच पुस्तके असावीत यादृष्टीने संबंधित सर्व घटकांशी संपर्क साधून ग्रंथालय अभ्यासक, वाचक यांच्यादृष्टीने परिपूर्ण करावे असे निर्देश आयुक्तांनी दिले. तसेच त्याठिकाणी सध्याच्या माहिती तंत्रज्ञान युगाला साजेशी अद्ययावत ई-लायब्ररीची सुविधा उपलब्ध करून देण्याचे कामही विहित वेळेत करण्याचे निर्देश त्यांनी  दिले.

      भारतरत्न डॉ. बाबासाहेब आंबेडकर यांचे जीवनचरित्र दुर्मिळ छायाचित्रांच्या माध्यमातून प्रदर्शित करणारे  माहितीपूर्ण दालन आकर्षक असावे तसेच पॅनलवरील मजकूर क्यू आर कोड स्कॅन केल्यानंतर हेडफोनव्दारे ऐकता येईल अशाप्रकारे  अद्ययावत सुविधांनी परिपूर्ण करण्याच्या दृष्टीने गतीमान कार्यवाही करण्याचेही निर्देशित करण्यात आले. स्मारकातील विशेष दालनात आभासी वास्तवदर्शी चित्रणाव्दारे (Augmented Reality) बाबासाहेबांचे प्रत्यक्ष संवादात्मक भाषण दाखविण्याच्या संकल्पनेविषयीदेखील विस्तृत चर्चा करण्यात आली.

      *भारतरत्न डॉ. बाबासाहेब आंबेडकर यांचे सेक्टर 15 ऐरोली येथे उभारले जात असलेले स्मारक त्यांच्या महापरिनिर्वाणदिनी जनतेसाठी खुले व्हावे हे आपले उद्दिष्ट असून त्यासाठी जलद गतीने कामे करताना त्यामध्ये बाबासाहेबांच्या लौकिकाला साजेशी गुणवत्ता राखण्याकडेही काटेकोर लक्ष देण्याचे निर्देश देत आयुक्त श्री. अभिजीत बांगर यांनी 30 नोव्हेंबर ही काम पूर्ण करण्याची आपली डेडलाईन डोळ्यांसमोर ठेवून युध्दपातळीवर काम करण्याचे निर्देश संबंधितांना दिले आहेत.*