कोव्हीड - 19 : सांख्यिकी तपशील (दि.18/04/2020 रोजी, दुपारी 4 वा.पर्यंत अद्ययावत)

कोव्हिड - 19 आजचे अपडेट (18/04/2020)

l आज पॉझिटिव्ह नोंदीत रूग्ण संख्या - 01                   l एकूण पॉझिटिव्ह नोंदीत रूग्ण संख्या - 60 

l कोपरखैरणे सेक्टर 8 येथील रहिवाशी असलेल्या महापे एमआयडीसी येथे बँकींग संबंधित कामकाज करणा-या कंपनीमध्ये सुरक्षा रक्षक म्हणून कार्यरत एका व्यक्तीचे कोरोना टेस्ट रिपोर्ट पॉझिटिव्ह आलेले असून त्या कंपनीत चेंबुर येथून येणा-या व्यक्तीच्या संपर्कात आल्याने त्यास कोरोना लागण झाली असावी. सदर कंपनीमार्फत खाजगी लॅबमध्ये सर्व कर्मचा-यांच्या करण्यात आलेल्या कोरोना चाचणीमध्ये सदर व्यक्तीची कोरोना टेस्ट पॉझिटिव्ह आलेली असून त्याच्या निकटवर्तीय संपर्कात असणा-या 8 व्यक्तींचे स्वॅब सॅम्पल्स तपासणीसाठी घेण्यात आलेले आहेत. या क्षेत्रांचे निर्जंतुकीकरण करण्यात येत असून सदर क्षेत्र कंन्टेनमेंट झोन म्हणून जाहीर करण्यात येत आहे.

बेघर, निराधार, मजूर, विस्थापित कामगार, गरजू नागरिकांना मदतकार्य

l विभागवार निवारा केंद्र एकूण संख्या                               :-  17 + 1 (सिडको एक्झि.सेंटर)

l सद्यस्थितीत कार्यान्वित निवारा केंद्र संख्या                         :-  05 + 1 (सिडको एक्झि.सेंटर)

l निवारा केंद्रातील एकूण नागरिक संख्या                             :-   391

l नमुंमपा शाळा क्र. 01, बेलापूर निवारा केंद्र नागरिक संख्या             :-    31

l नमुंमपा निवारा केंद्र, आग्रोळी, से.11, बेलापूर निवारा केंद्र नागरिक संख्या :-    20

l नमुंमपा शाळा क्र. 6, से. 6, सारसोळे, नेरूळ निवारा केंद्र नागरिक संख्या :-    12

l नमुंमपा निवारा केंद्र, घणसोली निवारा केंद्र नागरिक संख्या            :-     48

l नमुंमपा शाळा क्र. 102, से. 14, ऐरोली निवारा केंद्र नागरिक संख्या     :-    63

l सिडको एक्झिबिशन सेंटर, से.30, वाशी निवारा केंद्र नागरिक संख्या      :-   217

l सद्यस्थितीत कार्यान्वित सहा निवारा केंद्रात असलेल्या 391 व्यक्तींना अल्पोपहार, चहा आणि सकाळचे व दुपारचे जेवण महानगरपालिकेने स्थापित केलेल्या सेक्टर 19, नेरूळ येथील कम्युनिटी किचनव्दारे दिले जात आहे.

l याशिवाय कोव्हीड - 19 आपत्ती व्यवस्थापन केंद्राच्या नियंत्रण कक्षातील टोल फ्री क्रमांकावर तसेच विभाग कार्यालयांमध्ये आलेल्या मागणीनुसार महानगरपालिका क्षेत्रातील गरजू मजूर, कामगार, विस्थापित कामगार, बेघर नागरिक, काळजी घेण्यास कोणी नसलेल्या दिव्यांग व्यक्ती, ज्येष्ठ नागरिक अशा 26902 व्यक्तींना आज स्वयंसेवी संस्था, दानशूर व्यक्ती यांच्या सहयोगाने जेवण दिले गेले आहे. 

l महानगरपालिकेच्या वतीने 8 विभागांमध्ये 17 ठिकाणी निवारा केंद्रांचे विभागवार नियोजन करण्यात आले असून 1400 व्यक्तींच्या निवा-याची व्यवस्था करण्यात आलेली आहे.

l या निवारा केंद्रातील नागरिकांना अल्पोपहार व जेवण पुरविण्यासाठी 12 कम्युनिटी किचनचे नियोजन करण्यात आले आहे.

नवी मुंबई महानगरपालिका

प्रसिध्दीकरिता - दि. 18/04/2020

कोव्हिड - 19 तपासणी करीता स्वॅब सॅम्पल घेताना काचेच्या केबिनचे सुरक्षा कवच

      कोरोनाचा विषाणू हा संसर्गातून पसरणारा असल्याने दैनंदिन जीवनात नियमित काळजी घेणे अत्यंत महत्वाचे आहे. त्यातही पॉझिटिव्ह रुग्णांच्या संपर्कात आलेल्या अथवा कोरोना संबंधित लक्षणे आढळणा-या व्यक्तींचे स्वॅब सँपल घेताना अधिक दक्षता घेण्याची गरज लक्षात घेऊन नवी मुंबई महानगरपालिकेने महापालिका आयुक्त श्री. अण्णासाहेब मिसाळ यांच्या मार्गदर्शनाखाली साऊथ कोरियाच्या धर्तीवर 3 बाय 3 फूट आकाराच्या केबिनच्या स्वरुपात कोव्हिड - 19 स्वॅब सॅंपल कलेक्शन सेंटर तयार केले आहे. याव्दारे एकप्रकारे स्वॅब सँपल घेणा-या वैद्यकीय अधिकारी / कर्मचारी यांना कोव्हिड - 19 चे सुरक्षा कवच लाभलेले आहे.

      वाशी येथील डेडिकेटेड कोव्हिड - 19 रुग्णालय याठिकाणी 2 तसेच ऐरोली व नेरूळ सार्वजनिक रुग्णालय आणि बेलापूर येथील माता बाल रुग्णालय याठिकाणी 1 अशी एकूण 5 कोव्हिड - 19 स्वॅब सॅंपल कलेक्शन सेंटर तयार करण्यात आली असून त्याव्दारे सुरक्षितरित्या स्वॅब कलेक्शन करण्यात येत आहे.

      ही स्वॅब कलेक्शन सेंटर म्हणजे 3 बाय 3 फूट आकाराची केबीन असून त्याला पुढील बाजुने समोरील माणूस दिसू शकेल अशाप्रकारे काचेचे आवरण लावण्यात आलेले आहे. या काचेला 2 हॅंडग्लोव्हज जोडण्यात आले असून स्वॅब कलेक्शन करणारी व्यक्ती या केबिनमध्ये जाऊन केबिन बाहेरील व्यक्तीचे हँडग्लोव्हजव्दारे सुरक्षितरित्या स्वॅब सँपल घेऊ शकते. यामुळे या दोघांचा परस्पर संपर्क टाळला जावून संभाव्य संसर्ग टाळला जातो. या काचेच्या केबिनमुळे सँपल घेणा-या वैद्यकीय अधिकारी / कर्मचारी यांना एक प्रकारचे सुरक्षा कवच लाभलेले असून त्यांच्या मनातील असुरक्षिततेची भावना दूर झाली आहे.

नवी मुंबई महानगरपालिका

प्रसिध्दीकरिता ( दि. 18/04/2020 )

ए.पी.एम.सी. मार्केटमध्ये कामगार, व्यापारी, कर्मचारी यांच्या वैद्यकीय तपासणीसाठी विशेष कक्ष

            'कोव्हीड 19' चा प्रसार रोखण्यासाठी विविध पातळ्यांवर प्रयत्न केले जात असताना हा संसर्गातून पसरणारा आजार असल्याने गर्दी होऊ न देणे हाच त्यावर प्रभावी उपाय आहे. या अनुषंगाने नवी मुंबई महानगरपालिका विविध उपाययोजना करीत आहे. याबाबत ठाणे जिल्ह्याचे पालकमंत्री ना. श्री. एकनाथ शिंदे यांनी घेतलेल्या आढावा बैठकीत सूचित केल्याप्रमाणे ए.पी.एम.सी.मार्केटमधील व्यापारी, कामगार, अधिकारी, कर्मचारी, सुरक्षारक्षक, ट्रक चालक व क्लिनर्स यांच्या वैद्यकीय तपासणीकरिता तातडीने कोरोना नियंत्रक वैदयकीय तपासणी कक्ष सुरु करण्यात आला.

      पालकमंत्री महोदय यांच्या निर्देशानुसार, महापालिका आयुक्त श्री. अण्णासाहेब मिसाळ यांनी 12 तासाच्या आत त्वरीत ए.पी.एम.सी. प्रशासनाशी चर्चा करीत 5 मार्केटमध्ये कोरोना नियंत्रक वैद्यकीय तपासणी कक्ष स्थापन केले आहेत व फळ मार्केट, भाजीपाला मार्केट, दाणा मार्केट या तीन ठिकाणी तपासणी कामही सुरु केले. या तिन्ही ठिकाणी पहिल्या दिवशी 500 हून अधिक जणांनी वैद्यकीय तपासणी करून घेतली असून याठिकाणी सोशल डिस्टन्सींगचे पालन केले जात आहे.

      प्रत्येक कक्षात डॉक्टर आणि फार्मासिस्ट यांची नेमणूक करण्यात आली असून ते कक्षात येणा-या प्रत्येक नागरिकाचे थर्मल स्कॅनीग करीत आहेत तसेच त्यांच्याशी संवाद साधून त्यांच्या प्रकृतीविषयीची माहिती घेऊन त्यांना ताप, घशात खव-खव / खोकला, सर्दी, श्वसनास त्रास अशाप्रकारची लक्षणे आहेत काय याची विचारपूस करून त्यादृष्टीने तपासणी करीत आहेत व आजाराची तीव्रता बघून औषधोपचार सूचवित आहेत. या तपासणीमध्ये कोरोना सदृष्य लक्षणे आढळल्यास स्वॅब कलेक्शन मोबाईल व्हॅनव्दारे थुंकीचे नमुने तपासणीसाठी घेण्यात येणार आहेत.

      नवी मुंबईतील ए.पी.एम.सी. मार्केट ही आशियातील अत्यंत मोठी कृषी उत्पन्न बाजारपेठ असून त्याठिकाणी वाहनांची व माणसांची मोठ्या प्रमाणावर ये-जा असते. त्यामुळे खबरदारीची उपाययोजना घेत नवी मुंबई महानगरपालिकेमार्फत याठिकाणी कोरोना नियंत्रक विशेष वैद्यकीय तपासणी कक्ष स्थापन करण्यात आला आहे.

      भाजीपाला मार्केट येथील आवक-जावक सकाळी लवकर असल्याने येथील तपासणी कक्ष सकाळी 7 ते 11 यावेळेत कार्यरत असेल तसेच फळ मार्केट व दाणा मार्केट मधील तपासणी कक्ष सकाळी 10 ते सायं. 5 या वेळेत कार्यरत असणार आहे. मसाला मार्केट आणि कांदा-बटाटा मार्केट मधील कक्षही सुरू करण्यात येत आहेत. तरी ए.पी.एम.सी. मार्केट संबंधित सर्व घटकांनी या तपासणी कक्षाला भेट देऊन आपली आरोग्य विषयक तपासणी करून घ्यावी असे आवाहन महापौर श्री. जयवंत सुतार आणि महापालिका आयुक्त श्री. अण्णासाहेब मिसाळ यांच्या वतीने करण्यात येत आहे.