स्वच्छ भारत मिशन अंतर्गत ‘स्वच्छ सर्वेक्षण 2023’ ला सामोरे जाताना लोकसहभागावर विशेष भर देण्यात येत असून महापालिका आयुक्त श्री राजेश नार्वेकर यांच्या मार्गदर्शनानुसार विविध स्पर्धांचे आयोजन करण्यात आले आहे.

स्वच्छता कार्यामध्ये नागरिकांच्या कल्पकतेला वाव मिळावा या दृष्टीने आयोजित करण्यात आलेल्या विविध स्पर्धांमधील ‘भित्तीचित्र स्पर्धा’ आज नवी मुंबई महानगरपालिका मुख्यालयाच्या आवारात संपन्न झाली. यामध्ये 69 विद्यार्थी युवकांसह चित्रकार नागरिकांनीही सहभागी होत अत्यंत उस्फूर्त प्रतिसाद दिला. विशेषत्वाने न.मुं.म.पा. शाळा क्र. 113, शाळा क्र. 117, विद्याभवन स्कूल नेरूळ, न्यू हॉरायजन पब्लिक स्कूल ऐरोली, डॉनबॉस्को स्कूल नेरूळ, आय सी एल स्कूल तुर्भे, ज्ञान विकास हायस्कूल कोपरखैरणे या शाळेतील चित्रकार मुलांचा मोठ्या संख्येने सहभाग होता. नवी मुंबई महानगरपालिका क्षेत्रातील रहिवाशी असलेले जे जे स्कूल ऑफ आर्ट्सचे विद्यार्थी आणि चित्रकार यांनीही यामध्ये सहभाग घेतला

यावेळी घनकचरा व्यवस्थापन विभागाचे उपायुक्त तथा स्वच्छ भारत मिशनचे नमुंमपा नोडल अधिकारी डॉ. बाबासाहेब राजळे यांनी उपस्थित राहून स्पर्धकांचा उत्साह वाढवला.

भित्तीचित्र स्पर्धेकरिता (1) माझे शहर – माझा सहभाग. (2) प्लास्टिकमुक्त नवी मुंबई आणि (3) 3R (Reduce, Reuse, Recycle) हे 3 विषय देण्यात आले होते. महापालिका मुख्यालय आवारातील निश्चित केलेल्या भिंतीवर या स्पर्धकांनी अडीच तासाच्या अवधीत 2’ X 2’ आकारात भित्तीचित्र काढले.

‘स्वच्छ सर्वेक्षण 2023’ अंतर्गत 24 नोव्हेंबरला सकाळी 7 वाजता सेक्टर 14 कोपरखैरणे निसर्ग उद्यान येथे स्वच्छता विषयक चित्रकला स्पर्धेचे आयोजन करण्यात आले असून याही स्पर्धेत मोठ्या संख्येने सहभागी होऊन नवी मुंबईकर विद्यार्थी, नागरिकांनी शहर स्वच्छतेत आपल्या चित्रमय संकल्पना साकाराव्यात असे आवाहन महापालिका आयुक्त श्री राजेश नार्वेकर यांच्या वतीने करण्यात येत आहे