नवी मुंबई महानगरपालिका क्षेत्रातील दिव्यांगांना स्वयंरोजगारासाठी जागा व स्टॉल उपलब्ध करून देण्याकरिता 330 दिव्यांग अर्जदारांची यादी दि.04 नोव्हेंबर 2022 रोजी प्रसिध्द करण्यात आलेली होती. या यादीतील दिव्यांग व्यक्तींना सोडतीव्दारे स्टॉल वितरीत करण्याची प्रक्रिया दि.10 नोव्हेंबर 2022 रोजी विष्णुदास भावे नाटगृह, वाशी येथे पार पडलेली आहे.

           या सोडत प्रक्रियेमध्ये ज्या व्यक्तींना सूचनापत्र देण्यात आलेले आहे अशा व्यक्तींच्या मूळ कागदपत्रांची तपासणी दि.28 नोव्हेंबर ते दि.06 डिसेंबर 2022 पर्यंत ईटीसी अपंग शिक्षण व प्रशिक्षण केंद्र, वाशी येथे करण्यात आलेली होती. 

           यावेळी ज्या दिव्यांग अर्जदारांनी मूळ कागदपत्रे सादर केलेली नव्हती अशा दिव्यांगांना दि. 07 डिसेंबर ते दि.09 डिसेंबर 2022 पर्यंत कागदपत्रे सादर करणेबाबत कळविण्यात आलेले होते. परंतू अद्यापपर्यंत काही दिव्यांग व्यक्तींनी त्यांच्या मूळ कागदपत्रांची पडताळणी अद्यापपर्यंत पूर्ण केलेली नाही अथवा मूळ कागदपत्रे पडताळणीच्या वेळी त्या दिव्यांग व्यक्ती गैरहजर होत्या. 

          तरी, ज्या दिव्यांग अर्जदारांनी मूळ कागदपत्रांची पडताळणी अद्यापपर्यंत केलेली नाही अशा दिव्यांग अर्जदारांनी दि.13 ते 14 फेब्रुवारी 2023 या कालावधीत सकाळी 10.30 ते दुपारी 5.00 वाजेपर्यंत त्यांच्या मूळ (Original) कागदपत्रांसह (सूचनापत्र, दिव्यांग प्रमाणपत्र, वयाचा पुरावा, मालमत्ता कर देयक, आधार कार्ड तसेच शिधापत्रक) छाननीकरिता ईटीसी अपंग शिक्षण व प्रशिक्षण केंद्र, वाशी रेल्वेस्टेशन जवळ येथे  उपस्थित रहावे असे आवाहन करण्यात येत आहे.